An Aldaw na Biyernes asin An Uran

(elihiya kan babaying nabalo an puso)

Habu kong nag-uuran sa aldaw na Biyernes
huli ta pag sakuyang pigmamasdan an uran
sa aldaw na ini, nahihiling ko na garu ining mga luha,
luha na minabulos sa pisngi kan langit
pasiring sa daga na nag-aagrangay.
Garo kaidtong sarong Biyernes na nagbulos
an luha kan sarong ina pasiring sa daga
na kun saen pinatindog an dahilan kan saiyang
kagadanan asin kan satuyang pagkamundag
sa panibagong buhay.

Habu kong nag-uuran sa aldaw na Biyernes
huli ta pag sakuyang pigmamasdan an uran
sa aldaw na ini, garu ining mga suntok asin sampilong
na nagwawalat ki lata asin ludog sa sakuyang pandok
kun Biyernes na banggi
na an demonyo na natutungtungan ni San Miguel
duman sa Ginebra na iniinom kan sakuyang agom
minabuhat asin minasanib sa sa saiya.

Habu kong nag-uuran sa aldaw na Biyernes
huli ta pag sakuyang pigmamasdan an uran,
garu ining mga pana asin kutsilyo
na minatusok sa sakuyang puso
kaagid duman sa babaying nakagubing nin itom
na pigpuprusisyon kun Biyernes Santo
na may tusok na kutsilyo an saiyang puso
huli ta idto tanda na siya nagsasakit asin nagmumundo
Sa pagkagadan kan saiyang pinakanamumutan.
Siring man sa sakuya na labi-labi an pagsakit asin pagmundo
Sa pagkagadan kan lalaking sakuyang pinakasalan.